Bakı Beynəlxalq Avtovağzalında biletlərin qiyməti süni şəkildə artırılır?

Sərnişinlərlə sürücülərin mövqeyi üst-üstə düşmür

Son günlər Bakı Beynəlxalq Avtovağzal Kompleksindən ölkənin Gəncə, Zaqatala, Balakən, Şəki istiqamətlərinə bilet satışı artıb. Sərnişinlər də sürücülərin bundan sui-istifadə etməyə başladıqlarını bildirir. Sərnişinlərin sözlərinə görə, onlar biletləri kassadan deyil, sürücülərin özündən alır, özü də mövcud qiymətdən baha.

“Biz bileti sürücüdən alırıq. Özü də 6 manatlıq biletə 10 manat veririk”, deyə sərnişin İlhamə Seyidova bildirdi.

Sürücülər isə bu fikirlərlə razılaşmır. Onlar biletin kassada satıldığını deyirlər. Avtobuslarda daxili xidmətə gəldikdə isə, sürücülər deyir ki, belə xidmət olmadığından sərnişinlərin su, qida ehtiyacları müəyyən yerlərdə saxlanılır.

“Biz bilet satmırıq. Sərnişinlər bileti kassadan alırlar. Yol boyu isə avtobusu kafelərin yanında saxlayırıq. Kim istəyir düşür su, çay içir, yemək yeyir. Sonra yola davam edirik”, -deyə sürücü Hüseyn Tapdıqov bildirdi. Digər sürücülər də səslənən ittihamlarla razılaşmadılar.

Məsələ ilə əlaqədar MTRANS MMC-nin növbə rəisi Məhəmməd Abdullayev biletlərin kassadan kənarda satılmadığını bildirdi. Bundan əlavə, MTRANS rəsmisi də sərnişindaşımada avtobusların daxili xidmətinin nəzərə alınmadığını təsdiqlədi. Məsələ ilə əlqədar Məhəmməd Abdullayev onu da qeyd etdi ki, gün ərzində avtovağzaldan adi günlərdə 7-8 min sərnişin yola salınırsa, şənbə və bazar günləri sərnişin sıxlığı müşahidə olunur. Bu zaman sərnişinlərin sayı 11-12 minə çatır. Xidmətin isə nə qiymətində, nə də keyfiyyətində dəyişikliy olmayıb.