Bakı nəqliyyatında optimallaşma aparılacaq

Nəqliyyat Nazirliyi yeni proqramın icrasına başlayıb

Əgər dayancaqda gözlədiyiniz avtobus gəlməsə, təəccüblənməyin. Deməli, həmin nəqliyyat xətdən çıxıb. Belə ki, Nəqliyyat Nazirliyi yeni optimallaşma proqramını tətbiq etməklə, Bakı şəhərində fəaliyyət göstərən 264 sayda nəqliyyatın 47-ni bağlayacaq. Nəqliyyat Nazirliyi mətbuat xidmətinin rəhbəri Namiq Həsənovun sözlərinə görə, artıq prosesə başlanılıb və 57 nömrəli nəqliyyat xəttdən çıxarılıb.

"Nəqliyyatın optimallaşdırılması proqramı çərçivəsində biz maşınların ixtisarını həyata keçiririk. Bu, dünya maliyyə qurumları tərəfindən dəstəklənən bir layihədir. Optimallaşdırma proqramı çərçivəsində təxminən 264-ə yaxın nəqliyyatdan 47-si ləğv olunacaq”,- deyə Namiq Həsənov bildirib.

Namiq Həsənovun sözlərinə görə, artıq nəqliyyat vasitələrinin bir neçəsi ləğv olunub və onlardan yalnız 217-si işləyəcək: “Bu da o deməkdir ki, paralel nəqliyyat aradan qalxacaq və hansı istiqamətlərdə ehtiyac varsa, onlara yönəldiləcək. Optimal şəkildə 217 nəqliyyatın Bakı şəhərinə kifayət etməsi artıq yəqinləşib”.