Ermənilər Bakıya gələcək

Onların Sosialist İnternasionalın təşkil edəcəyi toplantıya qatılacağı bildirilir

Sosialist İnternasional Qafqazdakı münaqişələri yaxından izləyir və münaqişələrin tezliklə, xüsusən də, sülh yolu ilə həllinə dair öz töhfəsini verməyə çalışır. Bunu Bakıda səfərdə olan Sosialist İnternasionalın baş katibi Luis Ayala görüşlərin nəticəsi olaraq keçirdiyi mətbuat konfransında bildirib. Bu yaxınlarda qurumun Şərqi Avropa, Cənubi Qafqaz və Qara dəniz regionu üzrə komitəsinin Ermənistanda keçirdiyi iclası xatırladan baş katib eyni toplantının ikinci mərhələsinin Bakıda keçiriləcəyini və buraya bütün siyasi partiyalar, eləcə də Ermənistan və Gürcüstandan nümayəndələrin dəvət olunacağını bildirib.

Luis Ayala Bakıya ikinci dəfə səfəri ərəfəsində apardığı danışıqların faydalı olduğunu və dünyanın bir sıra ölkələrindən olan 170 partiyanı bir araya gətirən bu təşkilatın əsas məqsədinin müasir sosial demokratiyanın ətrafında, azadlıq uğrunda mübarizədə insanları birləşdirmək, eləcə də sosial ədalətin və bərabərliyin təmin edilməsinin olduğunu deyib.

“Sosialist İnternasional Qafqazda regional problemlərin sülh yolu ilə həll olunmasının axtarışındadır. Dağlıq Qarabağ münaqişəsi ətrafında baş verən prosesləri biz yaxından izləyirik. Düzdür, sülh hər şey demək deyil. Lakin sülh olmasa, nəyəsə nail olmaq da mümkün deyil. Bu səbəbdən də münaqişənin dinc yolla həlli labüddür”,- deyə "Sosialist İnternasional"ın baş katibi Luis Ayala bildirib.

Baş katib Luis Ayalanın sözlərinə görə, bu münaqişənin davam etməsi xüsusilə təmas xəttində yaşayan əhalini narahat edir: “Biz Dağlıq Qarabağ münaqişəsinin sülh yolu ilə həllini yaxınlaşdırmaq üçün öz töhfəmizi veririk”.