Araz Əzimov: "Bu dəyişiklik Ermənistanın qeyri-konstruktivliyini artıra bilər"

Rəsmi Bakı Gümrüdəki 102-ci hərbi baza ilə bağlı düzəlişə münasibət bildirib

Məlum olduğu kimi Rusiya Ermənistana hərbi dəstəyini qanuniləşdirir. Rusiya və Ermənistanın imzalamağa hazırlaşdığı protokol layihəsinə görə, Gümrüdəki 102 saylı hərbi baza yalnız Rusiyanın maraqlarını qorumayacaq, eyni zamanda Ermənistanın silahlı qüvvələri ilə birlikdə bu ölkənin təhlükəsizliyini təmin edəcək.

Yeni qərar Rusiya Federasiyasına Ermənistanı müasir silahlar və xüsusi hərbi texnika ilə təchiz etmək hüququ verir. Sənəddə həmçinin deyilir ki, Rusiya hərbi bazasının hərbi birləşmələri proseslərə tərəflərin qarşılıqlı razılaşmaları əsasında cəlb olunur. O cümlədən protokol layihəsinə görə, müqavilə 49 il müddətinə nəzərdə tutulur və əgər tərəflərdən hər hansı biri bu razılaşmanın qüvvədən düşməsinə tərəfdar olmaları ilə bağlı digər tərəfi müqavilənin növbəti müddətinin başa çatmasına ən azı altı ay qalmış yazılı şəkildə məlumatlandırdığı təqdirdə müqavilə avtomatik olaraq növbəti beş il müddətinə uzadılır.

Rəsmi Bakı isə bu razılaşmanın Azərbaycana qarşı yönəlmədiyinə ümid edir. Xarici işlər nazirinin müavini, prezidentin Dağlıq Qarabağ məsələləri üzrə xüsusi nümayəndəsi Araz Əzimov ANS-ə açıqlamasında Gümrüdəki 102-ci hərbi baza ilə bağlı düzəlişin Rusiya və Ermənistanın daxil işi olduğunu deməklə yanaşı, rəsmi Moskvanın hər zaman Azərbaycanı Ermənistanla hərbi əməkdaşlığın ölkəmizə qarşı yönəlmədiyinə əmin etdiyini bildirib və Azərbaycanın da həmişə buna inandığını söyləyib. Amma bununla belə nazir müavini narahatlıq üçün də əsas görür: ”Bu dəyişiklik regionda Ermənistanın təhlükəsizliyinin güclənməsi və bununla da onun qeyri-konstruktivliyinin artması təhlükəsini yarada bilər”.

Araz Əzimov əlavə edib ki, Azərbaycan öz ərazi bütövlüyünü bərpa etmək istiqamətində öz ərazisində hərbi əməliyyat apara bilər və bu yola əl atacağı təqdirdə heç bir beynəlxalq hüququ pozmayacaq.

Xatırladaq ki, Gümrüdəki 102-ci Rusiya hərbi bazası 1953-cü ildə Zaqafqaziya hərbi dairəsinin 7-ci Qvardiya Ümumqoşun Ordusunun 127-ci motoatıcı diviziyasının bazasında yaradılıb. Hərbi bazanın tərkibinə 3 motoatıcı polk, bir artilleriya, bir zenit-raket polku, bir tank taboru, bir hərbi təchizat bölüyü daxildir. 3624-cü aviabaza və 700-cü Hava Qüvvələrinin İstiqamətləndirmə Mərkəzi də 102-ci aviabazanın tərkibin hissələrindəndir. 102-ci bazanın sərəncamında həmçinin 100-ə qədər tank, 300-ə yaxın zirehli maşın, artilleriya sistemləri və müxtəlif növ zenit - raket kompleksləri var. Hərbi bazadakı şəxsi heyətin sayı isə 4 min nəfərdir.