"Görüşərik Türkiyə..."

Ceyms Cefferi: "Türkiyə XXI əsrin başlanğıcında dünyanın ən çox qazanan ölkəsidir"

ABŞ-ın Ankaradakı səfiri Ceyms Cefferi fəaliyyət müddətinin başa çatması ilə əlaqədar vida çıxışı edib. Haberler.com saytı “Cihan” agentliyinə istinadla xəbər verir ki, çıxışına “Görüşərik Türkiyə” ifadələri ilə son qoyan səfir bunları deyib: “Türkiyə üçün qayğılanmayın, Türkiyə XXI əsrin başlanğıcında dünyanın ən çox qazanan ölkəsidir. Sizə tövsiyə edərdim ki, yaranmış bu zəmin üzərində fəaliyyəti davam etdirin, dünyanı qucaqlayın”.

Ankaraya səfir kimi 2008-ci ildə gələn C.Cefferi bundan qabaq 3 dəfə Türkiyədə bu və ya digər rəsmi işə təyin olunub. O, 1999-2002-cillərdə Türkiyədəki ABŞ səfirliyində baş köməkçi vəzifəsində olub. Səfir onu da deyib ki, Türkiyəyə ilk dəfə 28 il öncə gəlib: “Türkiyəyə ilk dəfə gələndə, bu ölkə inkişaf yolunda olan bir ölkə idi. Ancaq bu gün NATO-da müttəfiqimiz, öndə olan dünya liderlərindən biridir”.

Türkiyəni Qərblə Şərqin kəsişmə nöqtəsində yerləşən önəmli, strateji əhəmiyyətli bir ölkə kimi xarakterizə edən Cefferi sözünə belə davam edib: “Türkiyənin iqtisadiyyatı sürətlə inkişaf edir. Bu ölkə müsəlman dünyasında ən çox demokratik inkişaf etmiş ölkədir. Türkiyənin nailiyyətləri ilə qürur duyuruq, inanırıq ki, ABŞ-Türkiyə münasibətləri həmişə normal olacaq və get-gedə dərinləşəcək”.

Xatırladaq ki, Ceyms Cefferi ABŞ prezidenti Barak Obama tərəfindən İraqa səfir postuna namizəd göstərilib. Senatın təsdiqindən sonra o, yeni işinə başlayacaq.